గంగవరం (రెడ్ బీ న్యూస్) 7 నవంబర్ 2021: ప్రత్తిపాడులో జరిగిన అల్లర్లతో సంబంధంలేని సిపిఐ ఎంఎల్ లిబరేషన్ రాష్ట్ర కార్యదర్శి బుగత బంగార్రాజుతో సహా మరో 36 మందిని అక్రమంగా అరెస్టు చేయడం దుర్మార్గపు చర్య అని నిరసిస్తూ ఆదివారం మండలంలోని రాములు దేవపురంలో లిబరేషన్ గిరిజన సంఘం నాయకులు నిరసన ర్యాలీ నిర్వహించారు. అల్లర్లకు బాధ్యులైన అధికార పార్టీ నాయకులను వదిలేసి సంబంధంలేని లిబరేషన్ నాయకులపై పోలీసులు తప్పుడు కేసులు పెట్టడం అన్యాయమన్నారు. లిబరేషన్ నాయకులపై దాడులు చేసి తిరిగి వారి పైన కేసులు పెట్టడం ఎంతవరకు సమంజసమన్నారు. ఈ కార్యక్రమంలో లిబరేషన్ గిరిజన సంఘం నాయకులు అల్లి చంద్ర రావు, కాటం దొర, సత్తియ్య దొర తదితరులు ఉన్నారు.