UPDATED 27th JULY 2026 11:00 AM
పిఠాపురం, రెడ్ బీ న్యూస్, జూలై 27: పేదరికం చదువుకు అడ్డంకి కాదని, పట్టుదల ఉంటే ఆకాశమే హద్దు అని నిరూపించాడు ఆ గ్రామీణ యువకుడు. వినికిడి, మూగ వైకల్యంతో బాధపడుతున్న తండ్రి పడుతున్న కష్టాన్ని చూసి పెరిగిన అతడు.. నేడు రూ. 1.06 కోట్ల భారీ వార్షిక వేతనంతో అంతర్జాతీయ కంపెనీలో ఏఐ (AI) ఇంజినీర్గా ఉద్యోగం సాధించి అందరికీ ఆదర్శంగా నిలిచాడు.
కాకినాడ జిల్లా పిఠాపురం నియోజకవర్గం, కొత్తపల్లి మండలం కుతుకుడుమిల్లి గ్రామానికి చెందిన మాల్తి అఖిలేష్ ఇటీవల నిర్వహించిన క్యాంపస్ ఇంటర్వ్యూలలో కెనడాకు చెందిన ప్రముఖ సంస్థలో ఏఐ (ఆర్టిఫిషియల్ ఇంటెలిజెన్స్) ఇంజినీర్గా ఎంపికయ్యాడు. పూర్తిగా 'వర్క్ ఫ్రమ్ హోమ్' పద్ధతిలో పనిచేసే ఈ ఉద్యోగానికి గాను అతనికి రూ. 1.06 కోట్ల వార్షిక ప్యాకేజీ లభించింది.
తల్లిదండ్రుల కష్టమే ప్రేరణ
అఖిలేష్ తండ్రి గంగాధరరావుకు వినికిడి, మూగ వైకల్యం ఉన్నప్పటికీ టైలరింగ్ చేస్తూ వచ్చే కొద్దిపాటి ఆదాయంతోనే కుటుంబాన్ని పోషిస్తూ ఇద్దరు పిల్లలను చదివించారు. తల్లి కూడా భర్త కుట్టిన దుస్తులకు చేతిపనులు (ఆల్టరేషన్స్/హేమింగ్) చేస్తూ కుటుంబానికి ఆసరాగా నిలిచారు. తల్లిదండ్రుల శ్రమను కళ్లారా చూసిన అఖిలేష్, చదువులో ప్రతిభ చూపుతూ ఈ ఉన్నత స్థాయికి చేరుకున్నాడు.
విద్యాభ్యాసం:
- పాఠశాల విద్య: కొత్తపల్లి వీవీఎస్లో పదో తరగతి వరకు చదివాడు.
- ఇంటర్మీడియట్: నారాయణ జూనియర్ కళాశాలలో ఎంపీసీ (MPC) పూర్తి చేశాడు.
- ఇంజినీరింగ్: సూరంపాలెం ఆదిత్య యూనివర్సిటీలో డేటా సైన్స్ విభాగంలో బి.టెక్ పూర్తి చేసి ఈ ఘనత సాధించాడు.
ఇటీవలే విధుల్లో చేరినట్లు తెలిపిన అఖిలేష్, తన విజయం పట్ల సంతోషం వ్యక్తం చేస్తూ తల్లిదండ్రుల ప్రోత్సాహమే తనను ఈ స్థాయికి చేర్చిందని పేర్కొన్నాడు. అఖిలేష్ సాధించిన ఈ ఘనవిజయంతో కుతుకుడుమిల్లి గ్రామంలో హర్షాతిరేకాలు వ్యక్తమవుతున్నాయి.
