UPDATED 6th JULY 2026 9:00 AM
* అధికారుల నిర్లక్ష్యానికి సజీవ సాక్ష్యం ‘ఆయుష్మాన్ ఆరోగ్య మందిర్’
* అడవిలా మారిన ప్రాంగణం..
* ప్రాణసంకటంగా వేలాడుతున్న విద్యుత్ తీగలు
* వారానికి రెండు రోజులే సేవలు..
* దిక్కుతోచని స్థితిలో నిరుపేద రోగులు
మండపేట, రెడ్ బీ న్యూస్, జూలై 6 : ప్రభుత్వ ఆసుపత్రి అంటేనే పేదల ప్రాణాలకు భరోసా ఇచ్చే వేదిక. కానీ, మండపేట మండలంలోని ప్రముఖ గ్రామమైన తాపేశ్వరంలో ఉన్న ప్రభుత్వ హోమియో వైద్యశాల (ఆయుష్మాన్ ఆరోగ్య మందిర్) పరిస్థితి చూస్తే మాత్రం రోగులకు గుండె గుభేల్మంటోంది. నిరుపేదలకు నాణ్యమైన ఆయుష్ వైద్య సేవలను చేరువ చేయాలనే సత్సంకల్పంతో 1972లో ఏర్పాటైన ఈ ఆసుపత్రి, నేడు అధికారుల ఘోర నిర్లక్ష్యం కారణంగా పూర్తిగా ‘గ్రహణ వీధి’లో కొట్టుమిట్టాడుతోంది.
అడవిని తలపిస్తున్న ప్రాంగణం.. విషసర్పాల భయం!
ఆసుపత్రికి వెళ్లే ప్రధాన దారి మార్గం అత్యంత ఇరుకుగా మారడమే కాకుండా, ప్రాంగణమంతా పిచ్చిమొక్కలు దట్టంగా పెరిగిపోయి ఓ చిట్టడవిని తలపిస్తోంది. దోమల వ్యాప్తితో పాటు విషజ్వరాలు, పాములు, తేళ్ల భయం వెంటాడుతుండటంతో ఆసుపత్రికి రావడానికి రోగులు తీవ్రంగా భయాందోళనలు చెందుతున్నారు. చికిత్స కోసం వస్తే కొత్త రోగాలు సంక్రమించేలా ఉందంటూ స్థానికులు వాపోతున్నారు.
ప్రాణాలు గుప్పిట్లో.. వేలాడుతున్న విద్యుత్ తీగలు
ఈ దుస్థితి చాలదన్నట్టు, ఆసుపత్రికి వెళ్లే దారిలో విద్యుత్ వైర్లు అత్యంత ప్రమాదకరంగా కిందికి వేలాడుతున్నాయి. ఏ క్షణంలో ఏ ముప్పు ముంచుకొస్తుందో, ఎప్పుడు ఏ ప్రాణం గాల్లో కలుస్తుందోనని స్థానికులు, రోగులు ప్రాణాలు గుప్పిట్లో పెట్టుకుని రాకపోకలు సాగిస్తున్నారు. విద్యుత్ శాఖ అధికారులకు, స్థానిక యంత్రాంగానికి ఎన్నిసార్లు మొరపెట్టుకున్నా ఫలితం శూన్యమని ప్రజలు ఆగ్రహం వ్యక్తం చేస్తున్నారు.
‘వారానికి రెండే రోజులు’.. ప్రైవేట్ ఆసుపత్రులే దిక్కు!
ఈ హోమియో వైద్యశాల దాదాపు ఎప్పుడూ మూసే ఉంటోందని స్థానికులు ఆవేదన వ్యక్తం చేస్తున్నారు. వారానికి కేవలం రెండు రోజులు (మంగళవారం, శుక్రవారం) మాత్రమే ఈ ఆసుపత్రి తలుపులు తెరుచుకుంటున్నాయి. రాయవరం గ్రామానికి చెందిన వైద్యులు వారానికి రెండు రోజులు మాత్రమే ఇక్కడికి వచ్చి డ్యూటీ చేసి వెళ్తుండటంతో, మిగిలిన రోజుల్లో తాళాలే దర్శనమిస్తున్నాయి. అత్యవసర సమయాల్లో నిరుపేద రోగులు ప్రైవేట్ ఆసుపత్రులను ఆశ్రయించి, అప్పులపాలవుతూ ఆర్థికంగా తీవ్రంగా నష్టపోతున్నారు.
ఇప్పటికైనా అధికారులు స్పందించాలి..
ఐదు దశాబ్దాలకు పైగా చరిత్ర ఉన్న ఈ హోమియో ఆసుపత్రిని కాపాడుకోవాల్సిన బాధ్యత అధికారులపై ఉంది. ఇప్పటికైనా ఉన్నతాధికారులు స్పందించి, తక్షణమే ఆసుపత్రి ప్రాంగణాన్ని శుభ్రం చేయించాలని, వేలాడుతున్న విద్యుత్ తీగలను సరిచేయాలని స్థానికులు డిమాండ్ చేస్తున్నారు. అలాగే, ఇక్కడ పూర్తిస్థాయిలో వైద్య సేవలు అందుబాటులో ఉంచి, పేద ప్రజల ప్రాణాలకు భరోసా కల్పించాలని తాపేశ్వరం గ్రామస్థులు కోరుతున్నారు.
