UPDATED 10th OCTOBER 2026 12:00 PM

​• కాకినాడ GGH బ్రాంచిలో 44 ఖాతాల బంగారం దుర్వినియోగం

​• నకిలీ ఆభరణాలు పెట్టి మాయం చేసిన గోల్డ్ అప్రైజర్ నరవ సూరిబాబు అరెస్ట్

​• 1020.53 గ్రాముల పసిడిని రికవరీ చేసిన కాకినాడ వన్ టౌన్ పోలీసులు

​కాకినాడ, రెడ్ బీ న్యూస్, అక్టోబర్ 10 : కాకినాడ జిజిహెచ్‌ (GGH) ఆవరణలోని 'బ్యాంక్ ఆఫ్ బరోడా' బ్రాంచిలో చోటుచేసుకున్న భారీ గోల్డ్ లోన్ మోసం కేసును కాకినాడ జిల్లా పోలీసులు వేగంగా ఛేదించారు. ఖాతాదారులు తాకట్టు పెట్టిన బంగారాన్ని దుర్వినియోగానికి పాల్పడిన బ్యాంకు గోల్డ్ అప్రైజర్‌ను అరెస్టు చేసి, అతని వద్ద నుంచి సుమారు ₹1.45 కోట్ల విలువైన 1020.53 గ్రాముల బంగారు ఆభరణాలను స్వాధీనం చేసుకున్నారు.

​మోసం వెలుగుచూసిందిలా..

​బ్యాంక్ ఆఫ్ బరోడా జీజీహెచ్ బ్రాంచిలో సుమారు 44 గోల్డ్ లోన్ ఖాతాలకు చెందిన 1056.90 గ్రాముల బంగారు ఆభరణాలు దుర్వినియోగానికి గురైనట్లు గుర్తించడంతో వన్ టౌన్ పోలీస్ స్టేషన్‌లో కేసు నమోదైంది (Cr.No.147/2026, U/s 316(4) BNS).

​ప్రధాన నిందితుడు, కాకినాడ రూరల్ మండలం చీడిగ గ్రామానికి చెందిన గోల్డ్ అప్రైజర్ నరవ సూరిబాబు (59) బ్యాంకులో పనిచేస్తూ, ఖాతాదారులు తాకట్టు పెట్టిన అసలు బంగారు ఆభరణాల స్థానంలో నకిలీ ఆభరణాలను ఉంచి మోసానికి పాల్పడినట్లు ప్రాథమిక దర్యాప్తులో తేలింది.

​ప్రత్యేక బృందాలతో రంగంలోకి..

​బ్యాంకింగ్ రంగంలో జరిగే మోసాలపై కాకినాడ జిల్లా ఎస్పీ శ్రీ జి. బిందు మాధవ్, ఐపీఎస్ ప్రత్యేక దృష్టి సారించి దర్యాప్తును వేగవంతం చేయాలని ఆదేశించారు.

​అదనపు ఎస్పీ (అడ్మిన్) డాక్టర్ మహంతి కిషోర్ కుమార్ పర్యవేక్షణలో, వన్ టౌన్ ఇన్‌స్పెక్టర్ ఎం. నాగ దుర్గారావు, ఎస్‌ఐ పి.వి.సి. స్వామి నాయుడు మరియు సిబ్బందితో కూడిన ప్రత్యేక బృందం శనివారం (10.10.2026) నిందితుడిని అరెస్ట్ చేసింది. దుర్వినియోగమైన మొత్తం 1056.90 గ్రాముల బంగారంలో ఇప్పటికే 1020.53 గ్రాముల ఆభరణాలను పోలీసులు రికవరీ చేశారు.

​పోలీస్ బృందానికి ఎస్పీ అభినందనలు

​కేసు నమోదు అయిన అతి తక్కువ సమయంలోనే నిందితుడిని బంధించి, రూ. 1.45 కోట్ల విలువైన బంగారాన్ని రికవరీ చేసిన వన్ టౌన్ సీఐ ఎం. నాగ దుర్గారావు, ఎస్‌ఐ స్వామి నాయుడు మరియు దర్యాప్తు బృందాన్ని జిల్లా ఎస్పీ జి. బిందు మాధవ్ ఐపీఎస్ ప్రత్యేకంగా అభినందించారు.