UPDATED 22nd JUNE 2026 8:00 PM
ఎమ్మెల్యే నిమ్మకాయల చినరాజప్ప
జూలై 14 నుంచి ఆగస్టు 19 వరకు ఉత్సవాలు
అధికారులతో ఉన్నత స్థాయి సమన్వయ కమిటీ సమావేశం
పెద్దాపురం, రెడ్ బీ న్యూస్, జూన్ 22 : ఆషాడ మాసంలో ప్రారంభం కానున్న ప్రముఖ పుణ్యక్షేత్రం పెద్దాపురం మరిడమ్మ అమ్మవారి జాతర మహోత్సవాలను అత్యంత వైభవంగా, విజయవంతంగా నిర్వహించాలని పెద్దాపురం ఎమ్మెల్యే నిమ్మకాయల చినరాజప్ప అధికారులను ఆదేశించారు. వచ్చే నెల (జూలై) 14 నుంచి ఆగస్టు 19వ తేదీ వరకు జరిగే ఈ జాతర ఏర్పాట్లపై సోమవారం ఆలయ ప్రాంగణంలో ఆర్డీవో పి. కృష్ణమూర్తి అధ్యక్షతన వివిధ ప్రభుత్వ శాఖల అధికారులు, కూటమి నాయకులతో సమన్వయ కమిటీ సమావేశం జరిగింది. ఈ సమావేశానికి ఎమ్మెల్యే చినరాజప్ప, డీసీసీబీ చైర్మన్ తుమ్మల రామస్వామి (బాబు) ముఖ్య అతిథులుగా హాజరై ఏర్పాట్లపై సుదీర్ఘంగా సమీక్షించారు.
విస్తృత ఏర్పాట్లపై ముందస్తు సమీక్ష
జాతరకు దేశవ్యాప్తంగా లక్షలాది మంది భక్తులు తరలివచ్చే అవకాశం ఉన్నందున, వారికి ఎలాంటి లోటుపాట్లు రాకుండా చూడాలని ఎమ్మెల్యే చినరాజప్ప స్పష్టం చేశారు. సమావేశంలో ప్రధానంగా కింది అంశాలపై సమీక్ష నిర్వహించారు:"దేశవ్యాప్తంగా గుర్తింపు పొందిన మరిడమ్మ అమ్మవారి జాతరను భక్తులు ఇబ్బంది పడకుండా చూడటం మన అందరి బాధ్యత. అన్ని శాఖల అధికారులు సమన్వయంతో పనిచేసి ఉత్సవాలను విజయవంతం చేయాలని నిమ్మకాయల చినరాజప్ప అన్నారు.
'మే ఐ హెల్ప్ యూ' కేంద్రాల ఏర్పాటు: ఆర్డీవో కృష్ణమూర్తి
ఈ సమావేశానికి అధ్యక్షత వహించిన ఆర్డీవో పి. కృష్ణమూర్తి మాట్లాడుతూ, జాతర కోసం రూపొందించిన యాక్షన్ ప్లాన్ను అధికారులు ఖచ్చితంగా అమలు చేయాలన్నారు. దూరప్రాంతాల నుండి వచ్చే భక్తులకు తగిన గైడెన్స్ ఇచ్చేందుకు వీలుగా ‘మే ఐ హెల్ప్ యూ’ (May I Help You) సెంటర్లను ఏర్పాటు చేయాలని సూచించారు. నిరంతర వైద్య సేవలు అందించేందుకు ప్రత్యేక వైద్య శిబిరాలు, సిబ్బందిని షిఫ్టుల వారీగా అందుబాటులో ఉంచాలని ఆరోగ్య శాఖను ఆదేశించారు.
ఈ సమన్వయ కమిటీ సమావేశంలో డీఎస్పీ ఏ.బి.జి.తిలక్, విద్యుత్ శాఖ ఏఈ సుబ్బారావు, మున్సిపల్ శానిటరీ ఇనస్పెక్టర్ బి. ఆదినారాయణ, దేవస్థానం చైర్మన్ చింతపల్లి శ్రీహర్ష, అసిస్టెంట్ కమీషనర్ కురం విజయలక్ష్మి, ఆలయ సిబ్బంది రమణ పాల్గొన్నారు. వేద పండితులు ఇంద్రగంటి ప్రసాద్ శర్మ, నాగదేవర వెంకట శాస్త్రి, మున్సిపల్ మాజీ చైర్మన్ రాజా సూరిబాబురాజు, జనసేన పార్టీ పెద్దాపురం పట్టణ అధ్యక్షుడు పొలమరశెట్టి సత్తిబాబు, కూటమి నాయకులు రంధి సత్యనారాయణ, బొలిశెట్టి రాంకుమార్ తదితరులు పాల్గొన్నారు.
