UPDATED 12th JUNE 2016 10:00 PM

రూ.13.87 లక్షలు పోగొట్టుకున్న కాకినాడ మహిళ

​టెలిగ్రామ్ లింక్‌తో నమ్మించి నిలువునా ముంచేసిన అపరిచిత వ్యక్తి

​సైబర్ పోలీసులకు ఫిర్యాదు చేసిన బాధితురాలు

కాకినాడ, రెడ్ బీ న్యూస్, జూన్ 10 : ఆన్‌లైన్ పార్ట్-టైమ్ ఉద్యోగాలు, టాస్క్‌ల పేరుతో అమాయకులను ముంచేస్తున్న సైబర్ నేరగాళ్ల వలలో పడి కాకినాడకు చెందిన ఒక మహిళ భారీగా నష్టపోయింది. వాట్సాప్, టెలిగ్రామ్ వేదికలుగా సాగిన ఈ ఘరానా మోసంలో బాధితురాలు ఏకంగా రూ.13,87,994 కోల్పోయింది. ఆలస్యంగా వెలుగులోకి వచ్చిన ఈ ఘటన స్థానికంగా కలకలం రేపింది.

​అసలేం జరిగిందంటే..?

​పోలీసుల కథనం ప్రకారం... కాకినాడ రూరల్ రామనయ్యపేట పరిధిలోని ఎడిద రెసిడెన్సీలో నివాసముంటున్న పసుపులేటి నవ్య (29) అనే మహిళకు మే 31వ తేదీన ఒక అపరిచిత వ్యక్తి నుండి వాట్సాప్ సందేశం వచ్చింది. తాము పంపే టెలిగ్రామ్ లింక్ (@MKT2021078) ద్వారా కొన్ని చిన్న చిన్న టాస్క్‌లను పూర్తి చేస్తే, డిపాజిట్ చేసిన సొమ్ముపై భారీగా లాభాలు మరియు అదనపు ఆదాయం సంపాదించవచ్చని సదరు వ్యక్తి ఆమెను నమ్మించాడు.

​ఆ మాయగాడి మాటలను నిజమని నమ్మిన నవ్య, లాభాల ఆశతో మే 31 నుండి జూన్ 5వ తేదీల మధ్య విడతలవారీగా పెద్ద మొత్తంలో డబ్బును డిపాజిట్ చేస్తూ వచ్చింది. తనకున్న ఐసీఐసీఐ, ఎస్‌బీఐ, యూనియన్ బ్యాంక్ ఖాతాల నుండి సైబర్ నేరగాళ్లు సూచించిన వివిధ మోసపూరిత బ్యాంక్ ఖాతాలకు యూపీఐ (UPI), ఐఎంపీఎస్ (IMPS), ఆర్‌టీజీఎస్ (RTGS) పద్ధతుల ద్వారా మొత్తం రూ. 13,87,994 బదిలీ చేసింది.

​చేతులు కాలాక...

​ఆ తర్వాత తాను డిపాజిట్ చేసిన సొమ్ముతో పాటు వచ్చిన లాభాలను విత్‌డ్రా చేసుకునేందుకు నవ్య ప్రయత్నించగా, అవతలి వైపు నుండి ఎటువంటి స్పందన కరువైంది. సైబర్ కేటుగాళ్లు స్పందించకపోవడంతో తాను ఘోరంగా మోసపోయానని గ్రహించిన బాధితురాలు తీవ్ర ఆవేదనకు గురైంది.

​మొదటగా జూన్ 8న బ్యాంక్ అధికారులను ఆశ్రయించడంతో పాటు జాతీయ సైబర్ క్రైమ్ పోర్టల్ (NCCR) లో ఫిర్యాదు చేసి, అక్నాలెడ్జ్‌మెంట్ నంబర్లు (30206260009514, 302062600094339) పొందింది. అనంతరం బుధవారం (జూన్ 10) కాకినాడ రూరల్ పోలీసు స్టేషన్‌లో లిఖితపూర్వకంగా ఫిర్యాదు చేసింది. బాధితురాలి ఫిర్యాదు మేరకు కేసు నమోదు చేసుకున్న పోలీసులు దర్యాప్తు ప్రారంభించారు.