★ ఆర్డీవో పసుపులేటి వెంకటరమణ

పెద్దాపురం (రెడ్ బీ న్యూస్) 7 జనవరి 2022 : జగనన్న సంపూర్ణ గృహ హక్కు పథకం (ఓటీఎస్)ను లబ్ధిదారులు సద్వినియోగం చేసుకోవాలని పెద్దాపురం ఆర్డీవో పి.వెంకటరమణ పేర్కొన్నారు. స్థానిక ఆర్డీవో కార్యాలయంలో శుక్రవారం ఆయన విలేఖరులతో మాట్లాడుతూ రాష్ట్ర ముఖ్యమంత్రి వై.ఎస్ జగన్ మోహన్ రెడ్డి ఈ సంపూర్ణ గృహ హక్కు పథకాన్ని ప్రవేశపెట్టి పేదలకు శాశ్వత గృహ హక్కు కల్పించాలని నిర్ణయించడం జరిగిందన్నారు. 1983వ సంవత్సరం లేదా అంతకుముందుగానీ ప్రభుత్వం పేదలకు డి- ఫారం పట్టాలు ఇచ్చి ఇళ్ళు కట్టించి ఇవ్వడం జరిగిందన్నారు. లబ్ధిదారులకు శాశ్వత హక్కు ఇవ్వాలని, ఇంటిపై రుణం తీసుకునేందుకు, అవసరమైతే వారి పిల్లలకు పసుపు కుంకుమ నిమిత్తం ఇచ్చుకునేందుకు, అప్పు తెచ్చుకునేందుకు, ఇల్లు విక్రయించుకునేందుకు వారికి హక్కు కల్పించాలని ప్రభుత్వం ఈ నిర్ణయం తీసుకోవడం జరిగిందన్నారు. గ్రామీణ ప్రాంతాల్లో ఉన్న వారికి రూ.10 వేలు, పట్టణ ప్రాంతాల్లో అయితే రూ.15 వేలు రుసుము చెల్లించి పట్టా పొందవచ్చని, ఈప్రక్రియ ఉగాది వరకూ కొనసాగుతుందని పేర్కొన్నారు. రాష్ట్ర ప్రభుత్వం నిస్వార్థంగా ఈ కార్యక్రమాన్ని అమలు చేస్తోందని, గృహ లబ్ధిదారులు ఓటీఎస్ పథకాన్ని సద్వినియోగం చేసుకోవాలని ఆయన కోరారు. అనంతరం మండల పరిధిలోని కాండ్రకోట, చదలాడ, తిరుపతి, జి. రాగంపేట, కట్టమూరు గ్రామాల్లో పర్యటించి లబ్దిదారులకు ఓటీఎస్ రుణ విముక్తి పత్రాలను ఆయన చేతులమీదుగా అందచేశారు.