UPDATED 1st JUNE 2026 3:00 PM
తుని, రెడ్ బీ న్యూస్, జూన్ 1 : రాష్ట్రంలోని అన్ని ప్రాంతాలను సమానంగా అభివృద్ధి చేయడమే లక్ష్యంగా తమ ప్రభుత్వం సరికొత్త ప్రణాళికలతో ముందుకు సాగుతోందని ముఖ్యమంత్రి నారా చంద్రబాబు నాయుడు వెల్లడించారు. గత ప్రభుత్వ హయాంలో దెబ్బతిన్న ఆర్థిక వ్యవస్థను అధిగమిస్తూనే, ఒకవైపు అభివృద్ధి, మరోవైపు ప్రజా సంక్షేమమే ధ్యేయంగా అడుగులు వేస్తున్నట్లు స్పష్టం చేశారు,.
మూడు ప్రధాన రీజియన్లుగా అభివృద్ధి వికేంద్రీకరణ:
రాష్ట్ర భవిష్యత్తును మార్చేలా మూడు ప్రధాన ప్రాంతాలను కేంద్రాలుగా చేసుకుని అభివృద్ధి ప్రణాళికలు సిద్ధం చేసినట్లు ముఖ్యమంత్రి ప్రకటించారు.
- విశాఖపట్నం రీజియన్: విశాఖను కేంద్రంగా చేసుకుని కాకినాడ, ఉమ్మడి తూర్పుగోదావరి జిల్లా పరిధిలోని ప్రాంతాల పారిశ్రామిక, ఆర్థిక ప్రగతికి బాటలు వేస్తున్నట్లు చెప్పారు.
- అమరావతి రీజియన్: రాజధాని అమరావతిని కేంద్రంగా మార్చి ఆ చుట్టుపక్కల ప్రాంతాలన్నింటినీ సర్వాంగ సుందరంగా తీర్చిదిద్దుతామన్నారు.
- తిరుపతి రీజియన్: రాయలసీమ ముఖచిత్రాన్ని మార్చేలా తిరుపతి రీజియన్ పరిధిలో ప్రత్యేక అభివృద్ధి కార్యక్రమాలు చేపట్టనున్నట్లు వివరించారు.
రాజకీయాల్లో రౌడీయిజం సాగనివ్వం: ఎన్డీఏ హెచ్చరిక
శాంతిభద్రతలకు విఘాతం కలిగిస్తూ, కత్తులు, కటారాలు అంటూ విచ్చలవిడిగా మాట్లాడే వారి ఆటలు ఇకపై సాగవని ముఖ్యమంత్రి తీవ్రస్థాయిలో హెచ్చరించారు,. "ఇక్కడ అధికారంలో ఉన్నది సాధారణ ప్రభుత్వం కాదు.. ఒకవైపు నేను, మరోవైపు పవన్ కళ్యాణ్, కేంద్రంలో ప్రధాని నరేంద్ర మోదీ నేతృత్వంలోని అత్యంత దృఢమైన ఎన్డీఏ కూటమి" అని ఆయన గుర్తుచేశారు. తప్పు చేసిన వారిపై కనీస చర్యలు తీసుకోని పార్టీలు రాజకీయ విలువల గురించి మాట్లాడటం హాస్యాస్పదమన్నారు.
రాక్షస ప్రవృత్తిపై పోరాటం:
నంద్యాలలో వైఎస్ రాజశేఖర్ రెడ్డి విగ్రహంపై దాడి చేసింది విపక్ష కార్యకర్తలేనని 20 నిమిషాల్లోనే తేలిపోయిందని, కేవలం రాజకీయ సానుభూతి కోసమే ఇలాంటి నీచమైన పనులకు ఒడిగట్టారని దుయ్యబట్టారు,. కాకినాడ డ్రైవర్ హత్య ఉదంతాన్ని ప్రస్తావిస్తూ, గత పాలకుల గర్వం ఏ స్థాయికి చేరిందో ప్రజలు గమనించాలన్నారు.
పూర్వం దేవతలు, రాజులు ప్రజా శ్రేయస్సు కోసం యజ్ఞాలు చేస్తుంటే రాక్షసులు అడ్డుపడేవారని.. ప్రస్తుతం తన పరిస్థితి కూడా అలాగే ఉందన్నారు. ఒకపక్క దుర్మార్గుల అరాచకాలను అణచివేస్తూనే, మరోపక్క పేదలకు పింఛన్లు, యువతకు ఉద్యోగ అవకాశాలు కల్పించే బాధ్యతను తానే స్వయంగా భుజానకెత్తుకున్నట్లు ముఖ్యమంత్రి చంద్రబాబు నాయుడు స్పష్టం చేశారు,.
