AP Districts SPs : ఏపీలో 26 జిల్లాలకు ఎస్పీల నియామకం

UPDATED 3rd APRIL 2022 SUNDAY 08:15 AM

AP Districts SPs : 13 జిల్లాల నవ్యాంధ్ర… ఇక 26 జిల్లాల ఆంధ్రప్రదేశ్‌గా మారింది. కొత్త జిల్లాలను ఖరారు చేస్తూ రాష్ట్ర ప్రభుత్వం తుది నోటిఫికేషన్‌లు జారీ చేసింది. అర్ధరాత్రి దాటాకా ఈ నోటిఫికేషన్లు విడుదలయ్యాయి. రెవెన్యూ శాఖ స్పెషల్‌ సీఎస్‌ జి.సాయిప్రసాద్‌ వీటిని విడుదల చేశారు. అర్ధరాత్రి 12 గంటల 10 నిమిషాలకు శ్రీకాకుళం జిల్లాతో తొలి నోటిఫికేషన్‌ జారీ అయ్యింది. తర్వాత ఒక్కో జిల్లాకు ఒక్కోటి చొప్పున నోటిఫికేషన్లు జారీ అవుతూ వచ్చాయి. సోమవారం నుంచి కొత్త జిల్లాలు అమలులోకి వస్తాయని ఆ ఉత్తర్వుల్లో తెలిపారు. కొత్త జిల్లాలను ప్రతిపాదిస్తూ జనవరి 25న ప్రభుత్వం తొలి నోటిఫికేషన్లు జారీ చేసింది. ఒక్కో లోక్‌సభ నియోజకవర్గాన్ని ఒక జిల్లాగా ఏర్పాటు చేయాలని నిర్ణయించుకుని… విస్తీర్ణం దృష్ట్యా అరకును మాత్రం రెండు జిల్లాలుగా విభజించింది. దీంతో ప్రభుత్వం 13 జిల్లాలను 26కు పెంచింది.

కొత్త జిల్లాల ప్రతిపాదనలపై ప్రభుత్వం మార్చి 7వ తేదీ వరకు అభ్యంతరాలు, సూచనలు స్వీకరించింది. మండలాలు, డివిజన్ల మార్పు, కూర్పుతోపాటు పేర్లపై సుమారు 12 వేల 600 అభ్యంతరాలు వచ్చాయి. వచ్చిన సూచనల మేరకు స్వల్ప మార్పులతో కొత్త జిల్లాలను ఖరారు చేసింది. కొన్ని జిల్లాల పరిధిలోని మండలాల్లో కొన్ని సవరణలు జరిగాయి. అలాగే.. ప్రాథమిక నోటిఫికేషన్లలోని కొన్ని జిల్లాల పేర్లలో చిన్న సవరణలు చేశారు. తిరుపతి కేంద్రంగా శ్రీ బాలాజీ జిల్లా ఏర్పాటు చేయాలని తొలుత ప్రతిపాదించారు. దీనిని ఇప్పుడు తిరుపతి జిల్లాగానే ఉంచారు. అలాగే… మన్యం జిల్లాకు బదులుగా పార్వతీపురం మన్యం అనే పేరు ఖరారు చేశారు.

రేపటి నుంచే కొత్త జిల్లాల్లో పాలన మొదలుకానుండడంతో… ఆయా జిల్లాలకు కలెక్టర్లు, జాయింట్‌ కలెక్టర్లు, ఎస్పీలను ప్రభుత్వం ఖరారు చేసింది. రాత్రి పొద్దుపోయాక ప్రభుత్వం ఉత్తర్వులు జారీ చేసింది. భారీగా ఐఏఎస్‌, ఐపీఎస్‌లను బదిలీ చేసింది. కొందరు కలెక్టర్లు, ఎస్పీలను మాత్రం పాత జిల్లాల్లో యథాతథంగా కొనసాగించారు. కొత్త జిల్లాల ఏర్పాటుతో 2014 బ్యాచ్‌ ఐఏఎస్‌ అధికారులకు తాజాగా కలెక్టర్‌ పోస్టులు దక్కాయి. పలు చోట్ల నగర కమిషనర్లుగా, ఇతర బాధ్యతల్లో పనిచేస్తున్న ఐఏఎస్‌ అధికారులకు కలెక్టర్‌ హోదా దక్కింది. కృష్ణా, గుంటూరు, తూర్పు గోదావరి జిల్లాలకు ఇప్పటివరకు కలెక్టర్లుగా ఉన్న నివాస్‌, వివేక్‌ యాదవ్‌, హరికిరణ్‌లకు కలెక్టర్లుగా అవకాశం ఇవ్వలేదు. వీరిలో కొందరికి పైస్థాయిలో కీలక పోస్టింగ్‌లు దక్కే అవకాశాలున్నాయని సమాచారం.

ఏపీలోని 26 కొత్త జిల్లాలకు కొత్త కలెక్టర్లు, జాయింట్ కలెక్టర్లు, ఎస్పీలను నియమిస్తూ ప్రభుత్వం ఉత్తర్వులు జారీ చేసింది. ఇందులో భాగంగా భారీగా IAS, IPSలను బదిలీ చేసింది. అల్లూరి సీతారామరాజు జిల్లా కలెక్టర్‌గా సుమిత్‌కుమార్‌, అనకాపల్లి జిల్లాకు రవి సుభాష్‌, కాకినాడ జిల్లా కలెక్టర్‌గా కృతికా శుక్లా, తూర్పుగోదావరి జిల్లాకు మాధవీలత, కోనసీమ జిల్లాకు హిమాన్షు శుక్లా, పశ్చిమ గోదావరి జిల్లా పి.ప్రశాంతి, ఏలూరుకు ప్రసన్న వెంకటేశ్‌, పార్వతీపురం మన్యం జిల్లా కలెక్టర్‌గా నిశాంత్‌ కుమార్‌ను నియమిస్తున్నట్లు ఉత్తర్వుల్లో పేర్కొంది. ఇప్పటికే విధులు నిర్వర్తిస్తున్న శ్రీకాకుళం, విజయనగరం, విశాఖ జిల్లా కలెక్టర్లు వారి స్థానాల్లో యధావిధిగా కొనసాగుతారని తెలిపింది.

26 కొత్త జిల్లాలకు ఎస్పీలను కూడా నియమించిన ఏపీ సర్కార్‌… మొత్తం 51 మంది ఐపీఎస్‌లను బదిలీ చేసింది. సీఐడీ ఎస్పీగా అమిత్‌ బర్దర్‌, పోలీస్‌ రిక్రూట్‌మెంట్‌ బోర్డు చైర్మన్‌గా మనీశ్‌కుమార్‌ సిన్హా, రైల్వే డీజీపీగా హరీశ్‌కుమార్‌ గుప్తా, టీటీడీ విజిలెన్స్‌ ఎస్పీగా నరసింహా కిశోర్‌ ను నియమించింది. ఇక కొత్త జిల్లాలైన అనకాపల్లి ఎస్పీగా గౌతమి, పార్వతీపురం ఎస్పీగా విద్యాసాగర్‌ నాయుడు, అల్లూరి సీతారామరాజు ఎస్పీగా సతీష్‌కుమార్‌, కాకినాడ ఎస్పీగా రవీంద్రనాథ్‌బాబు, కోనసీమ ఎస్పీగా సుబ్బారెడ్డి, ఏలూరు ఎస్పీగా అమ్మిరెడ్డి, విశాఖ సీపీగా సీహెచ్‌ శ్రీకాంత్‌, విజయవాడ సీపీగా క్రాంతి రాణా టాటాను నియమించింది.

జిల్లాల ఎస్పీలు వీరే..

శ్రీకాకుళం ఎస్పీగా జి.ఆర్‌.రాధిక

విజయనగరం ఎస్పీగా ఎం.దీపిక

అనకాపల్లి ఎస్పీగా గౌతమి

పార్వతీపురం ఎస్పీగా వి.విద్యాసాగర్‌ నాయుడు

అల్లూరి సీతారామరాజు ఎస్పీగా సతీష్‌కుమార్‌

కాకినాడ ఎస్పీగా ఎం.రవీంద్రనాథ్‌బాబు

కోనసీమ ఎస్పీగా సుబ్బారెడ్డి

తూర్పు గోదావరి జిల్లా ఎస్పీగా ఐశ్వర్య రస్తోగి

ప.గో. జిల్లా ఎస్పీగా యు.రవిప్రకాశ్‌

ఏలూరు ఎస్పీగా ఆర్‌.ఎన్‌. అమ్మిరెడ్డి

కృష్ణా జిల్లా ఎస్పీ సిద్ధార్థ కౌశల్‌

గుంటూరు ఆర్బన్‌ ఎస్పీగా ఆరీఫ్‌ హఫీజ్‌

పల్నాడు ఎస్పీగా వై.రవిశంకర్‌రెడ్డి

బాపట్ల ఎస్పీగా వకుల్‌ జిందాల్

ప్రకాశం ఎస్పీగా మల్లిక గార్గ్‌

నెల్లూరు ఎస్పీగా సీహెచ్‌ విజయరావు

తిరుపతి ఎస్పీగా పరమేశ్వర్‌రెడ్డి

చిత్తూరు ఎస్పీగా వై.రిషాంత్‌రెడ్డి

అన్నమయ్య జిల్లా ఎస్పీగా హర్షవర్ధన్‌రాజు

కడప ఎస్పీగా అన్బూరాజన్‌

అనంతపురం ఎస్పీగా ఫకీరప్ప

సత్యసాయి జిల్లా ఎస్పీగా రాజుల్‌దేవ్‌ సింగ్‌

కర్నూలు ఎస్పీగా సుధీర్‌కుమార్‌రెడ్డి

నంద్యాల ఎస్పీగా కె.రఘువీరారెడ్డి

విశాఖ పోలీస్‌ కమిషనర్‌గా సీహెచ్‌ శ్రీకాంత్‌

విజయవాడ కమిషనర్‌గా క్రాంతి రాణా టాటా

ads
×
  • Home
  • About Us
  • Politics
  • Crime
  • Devotional
  • Education
  • Entertainment
  • General
  • Business
  • Information
  • Gallery
  • Contact Us