UPDATED 10th JUNE 2026 3:00 PM
సామర్లకోట, రెడ్ బీ న్యూస్, జూన్ 10 : కాకినాడ జిల్లా సామర్లకోట పట్టణంలో ఓ వ్యక్తి చాకుతో వీరంగం సృష్టించడం తీవ్ర కలకలం రేపింది. బైక్పై వెళ్తున్న ఒక జంటపై సదరు వ్యక్తి ఒక్కసారిగా చాకుతో దాడికి యత్నించడంతో స్థానికులు భయాందోళనకు గురయ్యారు.
పోలీసులకు అప్పగించాల్సింది పోయి..
అయితే, దాడికి యత్నించిన వ్యక్తిని గమనించిన చుట్టుపక్కల ప్రజలు వెంటనే అప్రమత్తమై అతడిని పట్టుకున్నారు. అంతటితో ఆగకుండా, అతడి కాళ్ళు, చేతులు తాడుతో కట్టేశారు. అనంతరం అతడి టీ-షర్టు విప్పేసి, మండుతున్న ఎండలో కాలుతున్న తారు రోడ్డుపై పడుకోబెట్టారు.
స్థానికుల తీరుపై విమర్శలు:
సదరు వ్యక్తి ఉన్మాదిలా ప్రవర్తిస్తే.. అతడిని పట్టుకుని పోలీసులకు అప్పగించాల్సింది పోయి, చట్టాన్ని చేతుల్లోకి తీసుకుని స్థానికులు కూడా అలాగే ప్రవర్తించడంపై తీవ్ర విమర్శలు వ్యక్తమవుతున్నాయి. మండుటెండలో రోడ్డుపై అలా పడేయడం అమానుషమని, బాధ్యతారాహిత్యమని పలువురు అభిప్రాయపడుతున్నారు. ఈ ఘటనపై సమాచారం అందుకున్న పోలీసులు కేసు నమోదు చేసుకుని దర్యాప్తు చేస్తున్నారు.
