UPDATED 4th JUNE 2026 2:00 PM
* నాలుగు రోజుల ఆలస్యంగా దేశంలోకి ప్రవేశం
* వారం రోజుల్లో తెలుగు రాష్ట్రాల్లోకి విస్తరించే అవకాశం
* ఎల్నినో ప్రభావంతో ఈ ఏడాది సాధారణం కంటే తక్కువ వర్షపాతం?
MANSOON UPDATE : భీకరమైన మండుటెండలతో, ఉక్కపోతతో అల్లాడిపోతున్న దేశ ప్రజలకు భారత వాతావరణ శాఖ (ఐఎండీ) చల్లని కబురు చెప్పింది. దేశంలో వర్షాకాలానికి నాంది పలికే నైరుతి రుతుపవనాలు గురువారం (జూన్ 4) అధికారికంగా కేరళ తీరాన్ని తాకాయి. దీంతో భారత్లో ఈ ఏడాది వర్షాకాలం ప్రారంభమైనట్లు ఐఎండీ ప్రకటించింది. ప్రస్తుతం కేరళవ్యాప్తంగా రుతుపవనాలు విస్తరించడంతో అక్కడ విస్తృతంగా వర్షాలు కురుస్తున్నాయి.
నాలుగు రోజుల ఆలస్యంగా..
సాధారణంగా ప్రతి ఏడాది జూన్ 1వ తేదీనే నైరుతి రుతుపవనాలు కేరళను తాకుతాయి. అయితే ఈసారి సముద్ర, వాతావరణ పరిస్థితుల్లో వచ్చిన మార్పుల వల్ల వాటి పురోగతి మందగించి, నాలుగు రోజుల ఆలస్యంగా జూన్ 4న ప్రవేశించాయి. రుతుపవనాల అధికారిక ప్రకటనకు కావలసిన వర్షపాతం, గాలుల వేగం, మేఘావరణం వంటి అన్ని ప్రమాణాలు నెరవేరడంతో ఐఎండీ ఈ ప్రకటన చేసింది. ప్రస్తుతం కేరళలో భారీ వర్షాలు కురుస్తుండటంతో అలప్పుళ, కొట్టాయం, ఎర్నాకుళం జిల్లాలకు 'ఆరెంజ్ అలర్ట్' జారీ చేశారు.
వారం రోజుల్లో తెలుగు రాష్ట్రాల్లోకి!
రుతుపవనాల రాకతో తమిళనాడులోనూ వాతావరణం మారిపోయింది. అక్కడ ఇప్పటికే పలు జిల్లాల్లో వర్షాలు ప్రారంభమయ్యాయి. కాగా, కేరళలో ప్రవేశించిన రుతుపవనాలు ప్రస్తుతానికి చురుగ్గా కదులుతున్నాయని, వాతావరణ పరిస్థితులు ఇలాగే అనుకూలిస్తే రానున్న వారం రోజుల్లో ఇవి తెలుగు రాష్ట్రాల్లోకి ప్రవేశించే అవకాశం ఉందని వాతావరణ నిపుణులు అంచనా వేస్తున్నారు. దీనితో త్వరలోనే ఆంధ్రప్రదేశ్, తెలంగాణ ప్రజలకు ఎండల తీవ్రత నుండి ఉపశమనం లభించనుంది.
జూన్ ఆఖరి నాటికి దేశవ్యాప్తంగా విస్తరణ
ఐఎండీ అంచనాల ప్రకారం.. జూన్ నెలలో ఇవి వేగంగా పశ్చిమ తీర ప్రాంతాలతో పాటు ఈశాన్య రాష్ట్రాలకు విస్తరిస్తాయి. జూన్ మధ్య నాటికి మధ్యప్రదేశ్, ఛత్తీస్గఢ్ వంటి మధ్య భారత ప్రాంతాలకు చేరుకుని, జూన్ 27 నాటికి దేశ రాజధాని ఢిల్లీని తాకుతాయి. జూలై మొదటి వారం నాటికి దేశంలోని వాయవ్య రాష్ట్రాలైన పంజాబ్, హర్యానా, రాజస్థాన్లకు విస్తరించి దేశమంతటా స్థిరపడనున్నాయి.
ఎల్నినో ముప్పు: తక్కువ వర్షపాతమేనా?
అయితే, ఈ ఏడాది వర్షాకాలంపై పసిఫిక్ మహాసముద్రంలో ఏర్పడుతున్న 'ఎల్నినో' ప్రభావం ఉండే అవకాశం ఉందని ఐఎండీ హెచ్చరించింది. జూన్లో ఈ ప్రభావం బలహీనంగా ఉన్నప్పటికీ, సెప్టెంబరు నాటికి ఇది మరింత బలపడే సూచనలు కనిపిస్తున్నాయి. దీనివల్ల ఈ సీజన్లో దేశవ్యాప్తంగా సాధారణం కంటే తక్కువ వర్షపాతం నమోదయ్యే అవకాశం ఉంది. దీర్ఘకాల సగటుతో పోలిస్తే ఈసారి 90 శాతం మేరకే వర్షాలు కురిసే అవకాశం ఉందని, ఇది వ్యవసాయం, తాగునీటి నిల్వలపై ప్రభావం చూపవచ్చని నిపుణులు భావిస్తున్నారు. ఏదేమైనప్పటికీ, రుతుపవనాల రాకతో దేశవ్యాప్తంగా రైతుల్లో ఆశలు చిగురించాయి.
