UPDATED 1st NOVEMBER 2026 10 PM
వైఖానస ఆగమోక్తంగా వేంకటేశుని 14వ వార్షిక బ్రహ్మోత్సవాలు
సింహవాహనంపై యోగనరసింహుడిగా దర్శనమిచ్చిన స్వామివారు
నేడు వైభవంగా మహాసుదర్శన హోమం, గరుడవాహన సేవ
ఆత్రేయపురం, రెడ్ బీ న్యూస్, నవంబరు 1 : కోనసీమ తిరుమలగా పేరుగాంచిన వాడపల్లి దివ్యక్షేత్రంలో శ్రీదేవి, భూదేవి సమేత శ్రీ వేంకటేశ్వరస్వామివారి 14వ వార్షిక బ్రహ్మోత్సవాలు అత్యంత వైభవోపేతంగా, ఆధ్యాత్మిక శోభ నడుమ సాగుతున్నాయి. బ్రహ్మోత్సవాల నాలుగో రోజైన ఆదివారం స్వామివారికి విశేష అర్చనలు, దివ్య పూజాదికాలు ఘనంగా నిర్వహించారు.
దివ్య పరిణయ మహోత్సవం:
వివిధ రకాల సుగంధ పుష్ప మాలికలతో వర్ణశోభితంగా అలంకరించిన వసంత మండపంలో ఉత్సవమూర్తులు ఆసీనులయ్యారు. వైఖానస ఆగమ శాస్త్ర విశారదులు ఖండపల్లి రాజేశ్వరవరప్రసాదాచార్యులు బ్రహ్మత్వంలో, వేదపండితులు మరియు అర్చక స్వాములు విశ్వక్సేన పూజ, పుణ్యాహవచనం, పంచామృత మండపారాధన, ఉత్సవమూర్తులకు దివ్యాభిషేకం మరియు యాగశాలలో ప్రధాన హోమాలను మహాన్యాసపూర్వకంగా జరిపారు. అనంతరం లోక కల్యాణార్థం శ్రీనివాసుని దివ్య కల్యాణ మహోత్సవాన్ని కన్నుల పండువగా నిర్వహించారు.
వైభవంగా నరసింహ అవతారం – సింహవాహన సేవ:
సాయంత్రం స్వస్తివాచనం, చతుర్వేద స్వస్తి, బలిహరణ కార్యక్రమాలను వేదమంత్రోచ్ఛారణలు, మంగళవాయిద్యాల దివ్య రవళుల నడుమ నిర్వహింపజేశారు. అనంతరం రాత్రి వేళ స్వామివారు ఉగ్రరూప శమన భావుకుడై, అభయప్రదాతగా 'యోగనరసింహ' అవతారాన్ని ధరించి సింహవాహనంపై మాడ వీధుల్లో విహరించారు. స్వామివారి దివ్య మంగళ రూపాన్ని తిలకించిన భక్తజనం 'గోవిందా.. గోవిందా..' అంటూ చేసిన నామస్మరణలతో ఆలయ ప్రాంగణమంతా విష్ణులోకాన్ని తలపించింది.
ఈ దివ్య మహోత్సవంలో దేవస్థానం చైర్మన్ ముదునూరి వెంకట్రాజు, ఉప కమిషనర్ నల్లం సూర్యచక్రధరరావు, ధర్మకర్తల మండలి సభ్యులు మరియు విశేష సంఖ్యలో భక్తులు పాల్గొని స్వామివారి కృపాకటాక్షాలు పొందారు.
